修頓球場

修頓球場是灣仔居民心目中的重要標記，它滿載了當年灣仔居民的苦與樂，老人家的憶述讓我們可以想像，當年修頓球場一天裡展現著不同的面貌，日間勞動者在球場等待工作，晚上另一批勞動者又為人們提供娛樂，還有老人家津津樂道的足球賽，一個小小的球場讓勞動消費循環再生產，給這個基層社區培育了生命力。

「以前修頓球場沙地嚟㗎，初初有啲人賣下小食呀，整整下呢成晚咁，好似個夜總會咁，又有嘢食呀，又有人玩下魔術呀，做完拎個兜埋嚟呀，"打賞!打賞!" 你咪打賞一毫呀兩毫。」

「五、六點鐘點盞火水燈喺度，炒蜆呀，嗰陣時有啲所謂啫喱啦，一杯杯咁俾啲冰雪住擺喺度賣，又有啲魔術玩下，睇完又俾毫子人哋呀。嗰時無咁多消遣嘛，收音機都唔係成日有得聽。」

「有啲外省佬，啲人話：外江佬呀，賣武呀，有得睇呀，去睇吖。養咗隻馬騮仔，帶住隻狗呀，打下鑼鼓，隻馬騮識走去個箱度，識得著件衫，帶個面具上去呀，整古做怪。嗰隻狗呢又識得學大人樁米，有個米埳喺度，隻狗走去踩呀踩呀，細路仔好鍾意睇㗎嘛。」

「又有羊又有狗。嗰隻羊呢，隻馬騮就坐上去，師傅打起個鑼呢，佢講啲話我哋唔識聽，唔知佢講乜，嗰隻馬騮舞兩舞，又識得去換個面具出嚟，多數都係扮馬騮精呀，你未睇過㗎嘞，幾呀年前就有嘅。」

「上晝呢，嗰啲咕喱喺度等開工，多數都係潮州人嚟㗎。咁朝頭早呢揸住竹升好大條嘅，咁就有條繩綁住，喺後面棟晒喺度，一齊等人嚟請，踎喺度，揸住個水煙筒，竹筒嚟個喎，好長嘅，'boo boo boo boo'咁就食㗎嘞，你扯幾啖煙，俾嗰個又扯幾啖煙，咁樣嘅。」

「日頭呢，可能啲咕喱舊時病咗唔睇醫生，咁呢有啲…又係佢地啲鄉里嚟嘅，同佢『黏沙』呢，我好鍾意睇個噃，咁呀好似俾啲鹽水同佢搽下佢呢，俾隻手黏兩三下啫，成條紅色嘅血路一條條喺晒度㗎……黏到佢好大力，黏到'pop pop'咁聲個噃，黏到佢… …郁下(個膊頭)咁就行㗎嘞，佢要俾錢㗎。」

(灣仔出生，講述戰後修頓球場的面貌)