« 炸灣仔 | Main | 灣仔船街南固台 »

色情行業

Oralbarlockartrd 色情行業是灣仔的古老行業之一,從老街坊的憶述,色情行業竟是灣仔社區生活的一部份,有人習以為常,有人卻引以為恥。無論如何,色情行業的多變跟灣仔社區的轉變血脈相連,由妓寨到一樓一鳳,到今天一樣寄居在民居之中。換一個角度,汕頭街的妓寨、修頓球場附近的企街、白宮酒店的妓女,是否都可以視為勞動再生產的一個環節?

「咁汕頭里呢係一間咁坐喺門口呀咁嘅,係妓寨。出面嗰截呢汕頭街呀冇㗎,入邊汕頭里嗰啲呢就喺地下㗎啫,咁坐喺門口,嗰個呢就係都差唔多都叫做褓姆喇,坐門口嗰個啲阿嬸嚟㗎啫,佢做招呼囉,打掃呀咁,倒水呀叫。唔係龜婆,嗰啲唔出面㗎喇,呢啲就真係做阿嬸㗎咋。」

「入面呢你都睇唔到佢,要䁓下䁓下咁,咁嗰時間仲學吓啲所謂大寨嘅作風喇,我記得就係去䁓下佢呢,"入嚟坐喇咁。"你入去坐呢都得,你唔一定要幫襯㗎,但你起碼要抌低幾個仙喺度嚟,即係嗰啲叫『打水圍』呀叫做,有啲䁓下唔啱就走囉,我講啲尋芳客呀。」

「街舖嚟㗎,喺呀地下嚟㗎咋。(咁你哋細路仔都見到?喺出邊就咁見到?)見到!不過多數日頭冇嘢嘅。日頭本來就唔開嘅,但係後期呀,即係我記得我開始讀上高小嗰陣時,已經日頭都有啲有,即係可能又話生意難撈喇,嗰啲茶樓下晝收,冇人做生意㗎喇,啲妓寨開埋可以做多啲生意囉。」

「春園里下面呢我懂人性之後呀已經冇嘞,就搬走㗎嘞,嗰度呢就係叫做大number,當地啲香港人呢就叫做牛雜婆,即係叫蘇絲黃嗰啲,做bar girl嗰啲呀,大number就係嗰啲專做外國水手生意㗎嘛。喺春園里嘅,後來搬咗出去駱克道啫,佢大number要攞牌㗎。再後來就變咗渣飛道綠窗門就係咁囉,冚唪唥油晒綠色㗎,一睇就睇到囉,即係宜家就叫做一樓一鳳嗰啲咁。」

(灣仔出生、長大,講述戰前汕頭里妓寨)

Oralsailorgis 「有啲上咗年紀嘅女人帶埋嗰啲女人企喺街度,企喺修頓球場一帶,莊士頓道呢邊又有,軒尼詩道嗰邊又有,揸把扇撥撥下嘍啲男人呀,"先生,大姑娘呀,要唔要呀。" 聽佢細細聲講囉,譚臣道一迾都係咁企,菲林明道呀,譚臣道呀。咁夜晚黑呢,我哋一到四點零點鐘呢,我地十零歲唔行去嗰度,若果你行去嗰度呢,幾個人行都好啦,啲男人好曳㗎,喺後面同你講埋啲唔三唔四呀,嚇得你唔敢行嗰度㗎。」

「以前有好多帶街,專門帶啲海兵去玩嘅。灣仔區有好多黃色酒店㗎,最有名嗰間就喺莊士頓道、灣仔道嗰度,即係而家哈迪斯嗰個位置,有間叫做『白宮酒店』係黃色架步嚟㗎,嗰啲搵食嘅女人長駐喺嗰度㗎,有人帶出帶入,佢地唔同企街嗰啲,好少行出黎。嗰啲帶街我地叫佢做『打手』,英文唔係好叻㗎咋,成日聽倒係咁嗌"Hello!阿John!阿Jack!"咁就嘍生意㗎。」

Oralbargirl 「有陣時我見啲帶街帶佢地(妓女)去『馬島醫院』驗身,初初我聽人講淨係醫皮膚病嘅啫,我懂事嗰陣呢叫做『性病醫院』。有個女人帶住,後面有兩個男人跟住尾,成班去都係做嗰啲㗎嘞。佢喺灣仔道,而家『集成中心』對面,間醫院係政府嘅,強逼接海兵嗰啲(妓女)一定要去嗰度檢查,驚你有性病,惹到唔掂㗎嘛。」

「我見嗰啲媽媽生,人地嗌佢地做媽咪咁,多數都係外省婆,所謂外省人即係上海人,佢地講啲話唔學我地廣東話咁樣。佢地著繡花嗰啲布鞋呀,著條黑褲、著件花衫咁帶住佢地(妓女)行。嗰啲動作行出嚟你睇得出㗎,擔口煙仔,梳到個頭靚一靚,濃妝艷抹,夾住個手袋咁樣行嘅。你一睇就睇出佢唔係正當人家架嘞,佢識講幾句英文都唔定架。」

(灣仔出生,講述戰後娼妓在街上的情景)

December 21, 2004 in 歷史 | Permalink